الخميس، 10 يونيو 2010

كوميديا : لماذا سنظل دائما في الظل ؟؟؟ حين يفرط الناس في حريتهم ..

قبل الميعاد بكام يوم :
الريس : السنه دي سنه انتخابات والعين علينا والظاهر لازم نعمل اللي مش عايزين نعمله من زمان
نائب الريس : اه ياريس لازمن ولابد نعمله
الريس : طيب ازاي انت عارف ان اخر انتخابات كانت من عشر سنين وكسبتها بالعافيه ودلوقتي فيه ناس بتشكك في قدراتي الصحيه اعمل ايه ؟ لو حصل اي تغيير في المرحله الحاسمه دي هانضيع
نائب نائب الريس : ولا يهمك ياريس احنا فداك انا عندي خطه اولا نعلن عن فتح باب الترشيح لتجديد كل المناصب وم الاخر ما نقولش لحد اننا فتحنا باب الترشيح غير بعد ما يخلص الميعاد وبعدين ندعو لجمعيه عموميه للانتخاب وما نقولش برضه غير للناس اللي احنا متأكدين من ولاؤهم لينا او علي الاقل عدم ولاؤهم للخصوم ونستضيفهم في فندق نجمه ونص ياكلوا ويشربوا ويرتاحوا وياخدوا بدل سفر كمان والامور هاتمشي زي الفل
الريس : انت متأكد يا بني ؟
نائب نائب الريس : طبعا يا باشا مش المثل بيقولك اطعم الفم تستحي العين

يوم الاستنخابات:
صندوق زجاجي موضوع علي جمب وكراسي ومنصه وناس قاعدين بعد الفطار منتظرين شويه شاي وحتتين جاتوه
الريس : لو سمحتوا هدوء عشان نقدر نقول كل حاجه ونقول لكم علي انجازاتنا في السنين اللي فاتت كلها
الريس يمسك ورقه طويله مطويه ويفتحها ويقرأ منها : وقد قمت بعمل كذا كذا كذا كما انني عضو بكذا وكذا وقدمت لكم كذا وكذا
الناس نامت اصلا
نائب الريس : شكرا يا ريس والان يا خواتي موعدنا مع الانتخابات وسأقرأ لكم اسماء المرشحين
لمنصب الرئيس الدكتور فلان الفلاني ولم يتقدم احد امامه بالترشيح فيفوز بالتزكيه
لمنصب نائب الرئيس علان العلاني ولم يتقدم احد امامه بالترشيح فيفوز بالتزكيه
لمنصب الامين العام ترتان الترتاني ولم يتقدم احد امامه بالترشيح فيفوز بالتزكيه
كذا كذا كذا
وهكذا لائحه طويله باسماء كل الناس الموجودين في المناصب منذ عشرات السنين ولم يتقدم احد امامهم بالترشيح ففازوا جميعا بالتزكيه
الريس : نشكركم علي الثقه الغاليه والامانه الثقيله والان مع التعديلات التي ادخلناها علي اللائحه الاساسيه للقانون
الامين العام : ماده كذا كانت تقول " نقط نقط نقط : وبعد التعديل تقول " نقط نقط نقط نقط "
ماده كذا .... ماده كذا ... ماده كذا تقول بعد التعديل ان موعد الانتخابات يكون كل خمس سنوات
احد الحضور يعترض : بس خمس سنين مده طويله اوي ما نخليها كل سنتين ولا تلاته
الريس : اقعد يا بني كل ده تضييع وقت .. كل ده تحصيل حاصل لسه التعديلات طويله انت مش عايز تروح ولا ايه ؟
الامين العام يكمل
الريس بعد عده مواد : طيب يا جماعه انا هاسيبكم بقي مع الامين العام تكملوا التعديلات براحتكم وهاروح
المعترض : ازاي بس ياريس لازم تكون موجود
الريس : تعبت يا بني انا سني ما يسمحش بالكلام ده كله ؟
بعض الحاضرين : خلاص ياريس احنا وكلناك توافق علي التعديلات الباقيه بالنيابه عننا ومادام سيادتك هاتروح يبقي هانروح كلنا
تصفيق حاد
ملحوظه هامه جدا : الموقف ده حقيقي وحصل من كام يوم في انتخابات احد احزاب المعارضه
وتصفيق حاد للديمو من غير قراطيه

هناك 6 تعليقات:

غير معرف يقول...

السلام عليكم واشكرك علي رسالتك ومدونتك الجميلة ومستغربة لية ماهو دا الي بيحصل معانا من عشرات السنين وانتي مش عارفة ان شعبنا دايما سلبي في الامور دي والي يسقط نقطع في فروتة والي ينجح نقولة احنا معاك ودايما واقفين جنبك هي كلمة قالها الشيخ الشعرواي علي شعبنا اسف ان يكون سلبي علية رحمة الله

ola_barakat يقول...

المشكله يا صديقي ان ده حزب المفروض انه معارض يعني المفروض يطبق الديموقراطيه اللي بينادي بتطبيقها علي مستوي الدوله مش علي مستوي كام فرد هما اعضاء الحزب ده
والله كان موقف كوميدي جدا جدا

ميرا ( وومن ) يقول...

ونفهم من كدة ايه ؟؟

أن طول ما هو ده اللي بيحصل علي كل المستويات

مفيش فايدة

ola_barakat يقول...

طبعا يا ميرا
المفروض ان ده حزب معارض بيطالب بالديموقراطيه الحقيقيه في البلد ايا كانت البلد دي لكن لما الحزب المعارض يعمل كده يبقي تهريج ان نطالب الحكومه بان تكون ديموقراطيه

نسر الشرق يقول...

اذا كان رب البيت بالدف ضارب فشيمة اهل البيت ( احنا معاك ياريس )
ماستغربيش ياستى ان هى دى المعارضة
لماذا ؟
لاننا فى مصر معندناش معارضة
المعارضة الوحيدة اللى موجودة هى معارضة الشعب اما الاحزاب والكلام الفاضى بصراحة دى جزء من النظام يعنى ياجماعه احنا شكلنا وحش قوى بره لازم ندور على سعيد ظاظا يترشح فى المعارضه وبصراحة الشعب على حالته دى لا يستحق اكثر من هذا النظام وهذه المعارضه لان الناس فى الشارع حتى بتلعن الواسطة واول ما تكون ليها مصلحة تجرى تدور على الواسطة بتلعن التوريث والراجل قبل ما يسيب الوظيفة يعين ابنه مكانه
وهكذا
هذا النظام هو عينة من اغلبية الشعب ولا عزاء للاقلية الفاضلة
تحياتى ليكى ولمدونتك الرائعه
http://nisr-elsharq.blogspot.com

نسر الشرق يقول...

فين جديدك يا ست علا خلاص زمن ال .... خلاص انتهى دلوقتى عملين انتخابات على رئاسة سجن مزرعة طرة ههههههههههه