الخميس، 10 يونيو 2010

كوميديا : لماذا سنظل دائما في الظل ؟؟؟ حين يفرط الناس في حريتهم ..

قبل الميعاد بكام يوم :
الريس : السنه دي سنه انتخابات والعين علينا والظاهر لازم نعمل اللي مش عايزين نعمله من زمان
نائب الريس : اه ياريس لازمن ولابد نعمله
الريس : طيب ازاي انت عارف ان اخر انتخابات كانت من عشر سنين وكسبتها بالعافيه ودلوقتي فيه ناس بتشكك في قدراتي الصحيه اعمل ايه ؟ لو حصل اي تغيير في المرحله الحاسمه دي هانضيع
نائب نائب الريس : ولا يهمك ياريس احنا فداك انا عندي خطه اولا نعلن عن فتح باب الترشيح لتجديد كل المناصب وم الاخر ما نقولش لحد اننا فتحنا باب الترشيح غير بعد ما يخلص الميعاد وبعدين ندعو لجمعيه عموميه للانتخاب وما نقولش برضه غير للناس اللي احنا متأكدين من ولاؤهم لينا او علي الاقل عدم ولاؤهم للخصوم ونستضيفهم في فندق نجمه ونص ياكلوا ويشربوا ويرتاحوا وياخدوا بدل سفر كمان والامور هاتمشي زي الفل
الريس : انت متأكد يا بني ؟
نائب نائب الريس : طبعا يا باشا مش المثل بيقولك اطعم الفم تستحي العين

يوم الاستنخابات:
صندوق زجاجي موضوع علي جمب وكراسي ومنصه وناس قاعدين بعد الفطار منتظرين شويه شاي وحتتين جاتوه
الريس : لو سمحتوا هدوء عشان نقدر نقول كل حاجه ونقول لكم علي انجازاتنا في السنين اللي فاتت كلها
الريس يمسك ورقه طويله مطويه ويفتحها ويقرأ منها : وقد قمت بعمل كذا كذا كذا كما انني عضو بكذا وكذا وقدمت لكم كذا وكذا
الناس نامت اصلا
نائب الريس : شكرا يا ريس والان يا خواتي موعدنا مع الانتخابات وسأقرأ لكم اسماء المرشحين
لمنصب الرئيس الدكتور فلان الفلاني ولم يتقدم احد امامه بالترشيح فيفوز بالتزكيه
لمنصب نائب الرئيس علان العلاني ولم يتقدم احد امامه بالترشيح فيفوز بالتزكيه
لمنصب الامين العام ترتان الترتاني ولم يتقدم احد امامه بالترشيح فيفوز بالتزكيه
كذا كذا كذا
وهكذا لائحه طويله باسماء كل الناس الموجودين في المناصب منذ عشرات السنين ولم يتقدم احد امامهم بالترشيح ففازوا جميعا بالتزكيه
الريس : نشكركم علي الثقه الغاليه والامانه الثقيله والان مع التعديلات التي ادخلناها علي اللائحه الاساسيه للقانون
الامين العام : ماده كذا كانت تقول " نقط نقط نقط : وبعد التعديل تقول " نقط نقط نقط نقط "
ماده كذا .... ماده كذا ... ماده كذا تقول بعد التعديل ان موعد الانتخابات يكون كل خمس سنوات
احد الحضور يعترض : بس خمس سنين مده طويله اوي ما نخليها كل سنتين ولا تلاته
الريس : اقعد يا بني كل ده تضييع وقت .. كل ده تحصيل حاصل لسه التعديلات طويله انت مش عايز تروح ولا ايه ؟
الامين العام يكمل
الريس بعد عده مواد : طيب يا جماعه انا هاسيبكم بقي مع الامين العام تكملوا التعديلات براحتكم وهاروح
المعترض : ازاي بس ياريس لازم تكون موجود
الريس : تعبت يا بني انا سني ما يسمحش بالكلام ده كله ؟
بعض الحاضرين : خلاص ياريس احنا وكلناك توافق علي التعديلات الباقيه بالنيابه عننا ومادام سيادتك هاتروح يبقي هانروح كلنا
تصفيق حاد
ملحوظه هامه جدا : الموقف ده حقيقي وحصل من كام يوم في انتخابات احد احزاب المعارضه
وتصفيق حاد للديمو من غير قراطيه

الأربعاء، 9 يونيو 2010

اذا كان الصبر مفتاح الفرج نفسي اشوف الباب ده شكله ايه ؟

احنا كشعوب عربيه كل حياتها من قديم الازل حتي الان الزراعه او الرعي او حتي التعدين – وبالنسبه للصناعه مش عايزين نقول بلاش كسوف يعني – لنا طبيعه ديموجرافيه خاصه ( يعني ايه ديموجرافيه ؟ )
يعني شعوب عاشت مئات السنين علي الزراع .. سواء كان الري بالانهار او بالمطر نضع الحبه في الارض ثم نرويها ونقعد جمبها نقول مواويل لحد ما تكبر ثم نحصدها ونقايضها او نبيعها او نوردها لمخازن الحكومه
او نعيش علي الرعي يعني كل واحد يشتري له معزتين وهروف لا مؤاخذه ويسرح بيهم في الصحراء ويقعد جمبهم برضه يقول مواويل لحد ما ياكلوا ويشبعوا ويكبروا وينتجوا خرفان ومعيز صغيرين وشويه لبن
او حتي نظل نحفر الارض لحين خروج البترول ماشاءالله غزيرا متفجرا ونعبئه في براميل ونظل ننتظر حتي تشتريه الدول الاجنبيه بالبخس ولا بيهمنا الفلوس خالص – وبكره بترولنا يخلص ويبيعوا لنا بترولهم بالسعر اللي هما عايزينه واللي اخدناه منهم زمان هاندفع اضعافه بكره –
يعني من الاخر نحن شعوب بتاعت مواويل في الصبر ولسنا مثل الشعوب الاوروبيه مثلا والتي يجب عليهم دوام الحركه حتي لا يتجمدوا من البرد الذي يجعل اراضيهم غير صالحه للزراعه تقريبا فاضطروا لابتكار الصوب ذات درجات الحراره المناسبه وابتكروا حاجات كتير تساعدهم علي الحياه بنستوردها منهم بنجاح كبير والحمدلله
ولهذا تجد ان الشعوب العربيه شعوب مسالمه جدا وعشريه جدا الرئيس من دول يفضل رئيسا عليهم مدي الحياه رغم انه رئيس مش ملك .. ومهما كانت الحياه صعبه في عهده يقولوا لك اللي نعرفه احسن من اللي مانعرفوش ومحدش عارف اللي هايجي بعده ده هايعمل فينا ايه ؟ وحاجات بيصبروا بيها انفسهم علي ما الزرع يكبر
بل ويقولون شعرا في الصبر مثل
ساصبر حتي يصبر الصبر علي صبري
ساصبر حتي يعلم الصبر اني صابر
ساصبر حتي يقول الصبر اني صابر مثلك
وكلام كله صبر وشوك ومرار
والمحصله النهائيه لكل هذا الكلام ان كل تلك الشعوب صابره علي احوالها حتي يغير الله ما يشاء وقتما يشاء وكل ما يستطيعون فعله هو غناء الصبر في المواويل
لا اعتقد ان شعبا عاش العمر كله يزرع او يرعي او ينتظر خروج الكنوز من باطن الارض يمكن ان يفعل شيئا حيال اي شئ
معلش الصبر حلو برضه